حل عبقري لمنع الأزمة من الشمس والهواء.. إزاي الحكومة هتحل مشكلة قطع الكهرباء؟

فصل الصيف اللي جاي متوقع انه يكون واحد من اكثر السنين في مشاكله خاصة بالكهرباء، ياتري الحكومة بتستعد لتامين الكهرباء خلال فصل الصيف ازاي.. واية خطة الدولة علشان ميكونش في تخفيف أحمال مرة تانية. كلنا شوفنا وعيشنا الازمة الكبيرة اللي مرت بيها الدولة خلال 2023 وبداية 2024 واللي كانت متعلقة بخطة تخفيف الأحمال وقطع الكهرباء عن البيوت والمحافظات واللي بدأت معانا من قطع الكهرباء لمدة ساعة في اليوم لحد ما وصلت لـ3 ساعات في بعض الاحيان وكانت بتوصل لأكثر من كده في مناطق ومحافظات كتيرة، ولا تدخل الحكومة وصدور قرار بتدبير موارد دولارية لاستيراد غاز طبيعي ومازوت لتشغيل محطات توليد الكهرباء كانت الأزمة لسه موجودة لحد وقتا ده.طيب الدولة عملت اية علشان تحل أزمة تخفيف الأحمال وقطع الكهرباء علي الناس ؟.في البداية علشان الدولة تحل أزمة قطع الكهرباء علي الناس، وتنتهي أزمة تخفيف الأحمال، فالحكومة قررت أنها تخصص مبالغ دولارية كبيرة لتامين وشراء شحنات الغاز الطبيعي والمازوت اللي بتحتاجهم محطات توليد الكهرباء علشان تفضل شغاله وميبقاش في قطع تاني في التيار الكهربائي، وفعلا الحكومة نجحت في تأمين مخزون استيراتيجي من الوقود اللازم لتشغيل محطات التوليد.بعد ما الحكومة أمنت مخزون محطات التوليد، الدولة شافت أنه مش هيفنع طول الوقت نعتمد علي استيراد الغاز الطبيعي والمازوت خصوصا أن الاستيراد ده بيكلف الدولة مبالغ مالية كبيرة وكلها بالدولار، فكان لازم يكون في حلول بديلة، والحلول بدأت بمعرفة أصل المشكلة واللي كانت سببها هيا زيادة الأحمال الكهربائية علي الشبكة الموحدة للكهرباء وظهر طاقات جديدة مش معروفة نتيجة وجود سرقات كتيرة علي الشبكة الموحدة للكهرباء.خطة الحكومة لتوفير التيار بدأت علي شقين الأول منهم هو مواجهة ظاهرة سرقة التيار الكهربائي علي الشبكة وتم بيتم معالجته عن طريق استخدام التكنولوجيا الحديثة والتعاون مع شركات القطاع الخاص لمواجهة الأزمة، والتوسع في خطة تركيب العدادات الكودية للمخالفين، وكمان وقف العمل بنظام الممارسة في استهلاك التيار ده غير قرارات تغليظ عقوبات سرقة التيار واللي حاليا بتوصل للغرامة والحبس.الشق الثاني من خطة توفير استمرارية التيار الكهربائي بتعتمد علي توفير موارد جديدة لتشغيل التيار، وفعلا الدولة قدمت تسهيلات كبيرة جدا لشركات القطاع الخاص للدخول والمشاركة في أنتاج الكهرباء، من مصادر الطاقة الجديدة زي الرياح وطاقة الشمس، والتسهيلات دي كانت عبارة عن تخصيص الارض وكمان توقيع عقود شراء الطاقة بعد انتاجها، وبكده المستثمر بيكون ضامن حصوله علي الأرض بتسهيلات كبيرة ومش موجودة في اي مكان ده غير كمان أنه بيكون ضامن أنه هيبع الطاقة اللي انتاجها وبيكون جزء كبير منها بالدولار، وفعلا الدولة لحد دلوقتي قدرت تدخل طاقات جديدة وصلت لـ  2 جيجاوات لتأمين التيار استعدادا لفصل الصيف اللي جاي.