شوبير: “الحضري” ينقصه الثقافة.. والأخير يرد بغضب: “مثل حي للتلون”

حالة من الجدل والغضب، انتابت حارس مرمى النادي الأهلي السابق ومنتخب مصر، عصام الحضري، بسبب تصريحات أحمد شوبير، حارس مرمى النادي السابق ومنتخب مصر، والذي وصفه فيها بأنه ينقصه الثقافة.

كان الإعلامي أحمد شوبير قد قال خلال برنامج “أسرار”، مساء الخميس، المذاع عبر شاشة “النهار”: “الحضري عنده مشكلة أنه لازم تطلعي تقولي الحضري، نعمل ليلة ذكر أو مقام باسم سيدي الحضري، ميعجبوش غير تطلعي تقولي الحضري أحسن حارس وأرقام”.

نرشح لك: الأرصاد تحذر من طقس الجمعة

تابع: “ودايما بتكلم عنه وأديله حقه تالت ومتلت لأنه يستحق.. وأرقامه تشهد، لكن ليه دايمًا بيتكلم عن نفسه كده؟ حقق بطولات وإنجازات ولعب في كأس العالم وأمم إفريقيا، ودايمًا بديه حقه بالكامل، لكن عنده مشكلة معايا مش فاهمها”.

استكمل: “محدش بيديله حقه قدّي، وأنا ما عمري ما قللت منه.. مش المفروض هو اللي يقول عن نفسه أسطورة، الناس هي اللي تقول، زي صلاح.. الثقافة مهمة للشخص العادي ومش معناها شهادة، فده أعتقد مش موجود في عصام، لتكراره الحديث عن نفسه، الموضوع بقى ممل وسخيف”.

اختتم: “أنت حارس عظيم في تاريخ مصر وفي تاريخ إفريقيا، والناس كلها عارفة كده، ما تسيبنا إحنا نديلك حقك”.

تصريحات أحمد شوبير أثارت غضب “الحضري”، الأمر الذي دفعه للرد بغضب عبر حسابه على موقع التواصل الاجتماعي “فيس بوك”: بتكلمني عن الثقافة، وكانت فين الثقافة وأنت مطرود من شغلك وقاعد في البيت مرة واتنين لمخالفتك القواعد المهنية في الإعلام ومتعلمتش؟ وكانت فين الثقافة وأنت بتتوقف لإثارة الفتن والتعصب ومتعظتش؟ وكانت فين الثقافة وأنت بتهدد رئيس لجنة المسابقات بالرحيل وبتحرض الجماهير على الشغب والتجاوزات ومخوفتش؟

وكانت فين الثقافة وأنت مثل حي للتلون والتطبيل وتغيير المواقف يا مثقف عصرك وأوانك؟”.

ليتدخل “شوبير” ويرد بشكل مقتضب عبر حسابه بـ”فيس بوك”، كاتبا: “اوعي تدخل في جدال مع جاهل أبدا”. 

ليعقب “الحضري” مرة أخرى على كلامه، كاتبا: “فعلا.. اوعى تدخل في جدال مع جاهل قال على نفسه مزور، وجاهل قال على نفسه سلطان زمانه، وجاهل حافظ كلمتين بيتاجر بيهم، وقال ايه كده بقى مثقف مش معهد تعاون، صدق اللي قال رمضان بطيخة بقى مونامور”.