هنشغل أول مصنع في مصر.. ليه الحكومة مهتمة بتصنيع ألواح الطاقة الشمسية؟

مصر هتدخل مرحلة جديدة من الصناعات اللي العالم كله بيدور عليها وهيا صناعة الألواح الشمسية، ودي هتكون نقلة نوعية للصناعة المصرية.. ياتري اية هيا الصناعة دي وليه مصر بتهتم بيها.المؤتمر الصحفي اللي عقده الدكتور مصطفي مدبولي رئيس مجلس الوزراء من كام ساعة اتكلم فيه وقال أنه تفقد مصنعين متخصصين في إنتاج الألواح الشمسية، ودي بتعد من الصناعات المهمة للاقتصاد المصري، وأكد كمان أنه بنهاية 2025 هيكون لمصر القدرة للإنتاج الكامل لجميع مكونات الألواح الشمسية وده بيتماشى مع خطة ورؤية مصر لعام 2030 علشان نوصل بحجم الطاقة النظيفة لنسبة 42% من إجمالي إنتاج الطاقة المُنتجة في مصر.طيب اية سر اهتمام مصر بتصنيع الواح الطاقة الشمسية؟مصر في الوقت الحالي عندها خطة للتحول والاعتماد بشكل رئيسي علي الطاقة الشمسية، والخطة دي بتستهدف الوصول بحجم الطاقة النظيفة لـ42% من حجم الطاقة المنتجة في مصر في 20230 وهنوصل بحجم الطاقة لـ65% بحلول 2040، ودي قدرات كبيرة جدا الدولة بتستهدف توليدها من مصادر الطاقة الجديدة والمتجددة.في الوقت اللي فاتت الحكومة اتحركت وبشكل كبير جدا علشان تنوع مصادر الطاقة في مصر، وكمان علشان نقلل الاعتماد علي الوقوع الأحفوري واللي هو عبارة عن الغاز الطبيعي والمازوت واللي محطات توليد الكهرباء بتحتاجه علشان تفضل شغاله وتولد الكهرباء اللي الدولة محتاجها للتشغيل والأنارة، وفعلا الحكومة بتستهدف توليد الكهرباء من الشمس والرياح، وكمان هنولد الكهرباء من محطات الطاقة النووية واللي هتبدأ تدخل الخدمة في 2027.اهتمام مصر بتصنيع الواح الطاقة الشمسية قائم علي توفير وترشيد الاستهلاك علي الشبكة الموحدة للكهرباء، خصوصا في المناطق الصناعية والمؤسسات والهيئات الحكومية والقطاع الخاص، ومصر حاليا بتستهدف تشغيل جزء كبير من المؤسسات والمصانع والشركات عن طريق الطاقة اللي هتنتجها محطات توليد الكهرباء واللي بيتم تركيبها فوق المصانع والشركات وغيرها من المؤسسات والهيئات العامة والخاصة ، والحكومة في الفترة اللي فاتت قدمت تسهيلات كبيرة للشركات لتركيب الواح الطاقة الشمسية وكمان قدمت العدادات اللي تم تصنيعها للنوع ده من الطاقة واللي بتسمح بتبادل الطاقة مع الشبكة الموحدة للكهرباء.