الحق ومش هتدفع ولا مليم.. حسابات ببلاش من البنوك

يا ترى ايه حكاية الحسابات المجانية اللى البنوك بتفتحها لأى حد؟ وليه البنوك بتعمل كده ؟ وايه علاقة ده بالشمول المالي اللي بيطبقوا البنك المركزي ؟ بمناسبة اليوم العالمي للمرأة، البنوك في مصر بتقدم فرصة ذهبية لفتح حسابات بنكية مجانًا وبدون حد أدنى للإيداع. .الاحتفالية دي بتبدأ من 8 مارس وبتستمر لحد 31 مارس.. ودي فرصة ممتازة لكل ست مصرية إنها تستفيد من الخدمات البنكية وتدخل عالم الشمول المالي.طب إيه هي الخدمات اللي بتقدمها البنوك في الفترة دي؟البنوك بتتيح فتح حسابات جديدة للعملاء الجدد بدون أي مصاريف إدارية وبدون حد أدنى لفتح الحساب..  يعني ببساطة كل اللي محتاجاه هو صورة من بطاقة الرقم القومي بتاعتك.. وتقدري تفتحي حساب بكل سهولة.. كمان البنوك بتصدر بطاقات مدفوعة مقدمًا أو بطاقات خصم مباشر (ديبت كارد) وبتشجع العملاء على تفعيلها واستخدامها في عمليات الشراء.وإيه هي الفعاليات والمناسبات اللي البنوك بتقدم فيها الخدمات دي؟البنك المركزي المصري حدد مجموعة من الفعاليات على مدار السنة لتعزيز الشمول المالي، ومنها:احتفالية المرأة: من 8 إلى 31 مارس، بمناسبة اليوم العالمي للمرأة.اليوم العربي للشمول المالي: من 1 إلى 30 أبريل.احتفالية الشباب: من 1 إلى 15 أغسطس، بمناسبة اليوم العالمي للشباب.احتفالية الفلاح: من 1 إلى 15 سبتمبر، بمناسبة عيد الفلاح.احتفالية الادخار: من 15 إلى 31 أكتوبر، بمناسبة الأسبوع العالمي للشمول المالي واليوم العالمي للادخار.احتفالية الأشخاص ذوي الهمم: من 1 إلى 15 ديسمبر، بمناسبة اليوم العالمي لذوي الهمم.في الفترات دي.. البنوك بتتواجد خارج فروعها وبتعرض منتجاتها المصرفية في أماكن مختلفة زي المولات والجامعات.. وده بهدف الوصول لأكبر عدد ممكن من الناس وتعريفهم بالخدمات البنكية.طب إيه هو الشمول المالي وإيه أهميته؟الشمول المالي يعني إن كل فرد أو مؤسسة في المجتمع يكون ليهم القدرة على الوصول للخدمات المالية واستخدامها بشكل فعال وبأسعار مناسبة.  وده بيشمل خدمات زي الحسابات البنكية.. القروض، التأمين.. وخدمات الدفع الإلكتروني.. الشمول المالي بيساعد في تحسين المستوى المعيشي للأفراد وبيساهم في النمو الاقتصادي للدولة.طب وصلنا لفين في تحقيق الشمول المالي في مصر؟البنك المركزي المصري أعلن عن ارتفاع معدلات الشمول المالي لتصل إلى 74.8% بنهاية 2024، مقارنة بـ70.7% بنهاية 2023..  وبمعدل نمو 204% خلال الفترة من 2016 حتى 2024.. كمان عدد السيدات اللي بيستخدموا حسابات مالية وصل لـ23.3 مليون سيدة من إجمالي 33.9 مليون، بمعدل نمو بلغ 295% مقارنة بعام 2016، لتصل نسبة الشمول المالي للمرأة إلى 68.8%.الجهود دي بتعكس التزام الدولة بتوفير الخدمات المالية لكل فئات المجتمع.. وده بيساهم في تحقيق التنمية المستدامة وتحسين جودة الحياة للمواطنين.