استثمارات بـ25 مليار دولار.. امبراطورية العبار في مصر

ايه حكاية مليارات العبار في مصر وليه رجل الأعمال الإماراتي حريص على زيادة استثماراته في السوق المصري وقال ايه على القطاع السياحي في مصر وازاي مصر ممكن تتحول لرقم وأحد في عدد السياح عالميا.كلنا عارفين رجل الأعمال الإماراتي محمد العبار وإنه واحد من كبار رجال المال والأعمال في العالم وليه استثمارات بالمليارات في بلاد كتير وهو صاحب مجموعة اعمار العقاريه الضخمة.. والحقيقة العبار من اكتر رجال الأعمال العرب اللي بيساند الاقتصاد المصري من خلال مشروعات عقارية عملاقة وكلها من النوع الفاخر وبالارقام محمد العبار عندها استثمارات في مصر بحوالي 18 مليار دولار ودا حسب تصريحاته الأخيرة.المفاجأة أن رجل الأعمال الإماراتي محمد العبار، مؤسس شركة إعمار العقارية أعلن إنه هيضخ استثمارات جديدة في سوق العقار المصري باكتر من 7 مليار دولار خلال 36 شهر اللي جايين وبكده هتوصل إجمالي استثماراته في مصر 25 مليار دولار ودا رقم ضخم جدا طبعا وهيكون ليه انعكاسه على سوق تصدير العقار في مصر واللي البلد بتحقق فيه نجاحات كبيرة جدا في السنين الأخيرة.الأهم من استثمارات العبار الجديدة في مصر واللي لتقارب تقريبا قيمة قرض صندوق النقد الدولي الكلام اللي قاله من كام ساعة عن السوق المصري  واللي أكد فيها أن مصر عندها مقومات سياحية ضخمة تخليها رقم واحد في العالم استقبالا للسياحة  وقال إن مصر  تستحق أن تستقبل 170 مليون سائح سنويا بإيرادات 170 مليار دولار كل سنة وإنه لابد من مضاعفة الغرف الفندقية في مصر عدة أضعاف والعبار راجل بيزنس وعارف هو بيقول ايه وعارف إمكانيات مصر السياحية والتنوع اللي بتتميز فيه وإن القطاع دا قادر يقود الاقتصاد المصري لآفاق جديدة ويحقق إيرادات ضخمة خاصة مع المشروعات السياحية الضخمة اللي بتتنفذ دلوقتي في مصر زي المتحف المصري الكبير والساحل الشمالي ومشروعات البحر الأحمر والتجلي الأعظم ورحلة العائلة المقدسة وتطوير القاهره الخديوية وغيرها من المشروعات اللي هيقلب موازين السياحة في المنطقة كلها وعشان كده مصر لازم تشتغل على إضافة آلاف الغرف السياحية الجديدة للطاقة الفندقية الحالية. العبار اتكلم عن مشروعا مجموعته في مصر وقال إن استثمارات مشروع “ميفيدا” بتوصل إلى 3 مليارا دولار، وتملك “إعمار العقارية” أغلبية المشروع بمساحة 500 فدان وغيرها من المشروعات.. العبرة من كلام العبار أن القطاع السياحي في مصر قدامه تحديات وفرص عظيمة جدا إنه يكون رقم مهم في الاقتصاد المصري والدخل الدولاري وبيقول أن مصر قادرة بسهولة أنها تهزم الدولار بزيادة التدفقات الدولارية في السوق المصري وبالتالي ارتفاع سعر الجنيه المصري وقوته الشرائية والأهم إن الدولة قادرة تحقق دا وشغالة على ملف السياحة بقوة وفي يوليو الجاي مصر على موعد مع حدث عالمي في قطاع السياحة وهو افتتاح المتحف المصري الكبير واللي هيعمل دعاية ضخمة للسوق المصري ودا غير حملات الترويج العالمية للسياحة في مصر وآخرها فيديو البلوجر الأمريكي مستر بيست من الاهرامات واللي قلب الدنيا.