أهلي في الدار شافوا دعوات الناس وفرحوا بيا.. وبحلم أجيب شقة أعيش فيها

الخميس 06/مارس/2025 – 01:59 م

تداول مستخدمو منصات التواصل الاجتماعي مقطع فيديو لشاب يعمل مندوب توصيل، أوقفه شاب آخر من مبادرة حياة كريمة وطلب منه التبرع لغزة، فتفاجأ عندما لم يتردد وأعطاه 50 جنيهًا، رغم علامات التعب التي كانت واضحة عليه بسبب عمله الشاق، وعندما سأله المتطوع عن سبب التبرع، أجاب قائلًا: أتردد ليه؟ أهل غزة دول حبايبنا، وفي نهاية الفيديو، ظهر أن الشاب يدعى أشرف ويبلغ من العمر 22 عامًا.مندوب توصيل يتبرع لغزة يتصدر التريندوقال أشرف في تصريحات خاصة لـ القاهرة 24، إنه يتيم ويعيش طوال حياته في دار عائشة حسنين لرعاية الأيتام بالفيوم، كما أنه طالب في كلية نظم ومعلومات بالفرقة الرابعة.وأضاف: أنا عايش في الدار من صغري، فتحت عيني لقيت نفسي في الجمعية بقالي 22 سنة، وداخل في الـ 23.وأوضح: كانوا في الجمعية مسؤولين عن دراستي لحد ما كبرت، ولما جيت في تالتة ورابعة قررت أساعدهم وأشيل عنهم مصاريفي، فنزلت اشتغلت مندوب توصيل بقالي 8 شهور.رد فعل الناس فرّحني أويوعن الفيديو المتداول، قال أشرف: اتبسطت جدًا من رد فعل الناس والدعاوي اللي دعوهالي، فرحتني أوي أوي. بس لما الراجل وقفني وقاللي تتبرع لغزة، دي حاجة مفيهاش كلام أصلًا، عشان إخواتنا في غزة محتاجين ده، وأنا عادي يعني هقدر أعمل غيرها. أنا لسه بصحتي والحمد لله، وهما أولى بيها أكتر مني، اللي شافوه مش قليل، ودي أقل حاجة بسيطة ممكن أقدمها لهم.”حلم بسيط: شقة بعد الخروج من الدارواختتم أشرف حديثه قائلًا: أنا بحلم أجيب شقة أعيش فيها لما أخرج من الدار. الجمعية ليها فضل كبير عليّا، لأن لولاها كان زماني مرمي في الشارع، الله أعلم كان إيه حالي. بشكرهم إنهم ربوني وعلموني، وهما هنا أهلي، أبويا وأمي وإخواتي، وكل حاجة في حياتي، ومش بيرفضولي طلب. ولما شافوا الفيديو، فرحولي أوي وقالولي: انت تستاهل كل خير.