بنتي كانت ميتة من شهرين وزعلان عليها وعلى الشاب اللي حاول ينقذها
“كانت بتودعنا وماتت ضيفة خفيفة”.. صـ.ـدمة ووجع قلب والد “عايدة” طالبة المنوفية ضـ.ـحية القـ.ـطار: “الشاب اللي حاول ينقذها ولكنه رحل معاها راجل وحزني عليه زي حزني على بنتي
بكلمات تملؤها الدموع والحسرة، روى والد الطالبة “عايدة” تفاصيل اللحظات الأخيرة في حياة ابنته التي رحلت أسفل عجلات قـ.ـطار بركة السبع، في حـ.ـادث فجع المنوفية كلها بعد ومـ.ـاة شاب شهم حاول إنقاذها فـ.ـرحلا معاً.
كانت حلوة وطيبة.. والد طالبة المنوفية التي ماتت أسفل عجلات القطار يروي تفاصيل الساعات الأخيرة قبل رحيلها
كشف والد الطالبة عايدة تفاصيل اللحظات الأخيرة قبل وفاتها أسفل عجلات قطار بركة السبع بالمنوفية، وذلك بعدما راح ضحية الحادث أيضًا شاب حاول إنقاذها فماتوا معًا.
وقال والد الفتاة: كانت طيبة جدًا مسالمة جدًا ويومها مكنش فيه أي حاجة، معندناش إلا هي كان لها أخت اسمها عايدة برضه ماتت وهي شابة بس كانت متجوزة.
عايدة خارجة من البيت مفيش أي حاجة طلبت المصروف، كنت بحبها وأحسن أكل وأحسن لبس كان لها.
قبل الوفاة حصل إيه؟
عايدة ميتة من شهرين مش من يومين عايدة بقالها شهرين بتلف على خالتها، وكنت حاسس أن فيه حاجة هتحصل عايدة كانت بتودع، عايدة كانت حنينة وطيبة ولو حد قالها كلمة وحشة مبتردش عليه، كانت طيبة على الفطرة
إيه حصل يوم الحادث؟
هل كانت رايحة تجيب فطار، وهي ماشية جه القطار وفي شاب حاول ينقذها معرفش فرمى نفسه عليها فالقطار قطع ذراعها وهو خد صدمة القطار كلها.
حضرتك كنت فين لما جالك الخبر؟
كنت في الشغل لحظتها وكلموني وجيت شوفتها وعملت الإجراءات، جبناها وجينا وصلينا عليها المغرب هنا ودفناها، والله ما عارف الجنازة دي كلها جت منين، كان في ناس في جنازتها كتيرة جدا، تاني يوم روحت القبر بتاعها لقيت بنات المدرسة كلها هناك، وكان في بنات شدوا معاها كده في الكلام روحت لقيتهم واقفين على قبرها بيقولوا سامحينا يا عايدة، بنات بقى وبيبقى في بينهم شد ولكن هي كان ممكن تغلطي فيها ومتردش عليكي.
عايدة عندها كام سنة؟
عايدة كبرت بسرعة وماتت بسرعة وكانت ضيفة خفيفة في الدنيا والدنيا مكنتش حباها كان كل اللي يشوفها ميصدقش أنها عندها ١٥ سنة يقول دي شابة عمرها ٢٥ سنة كل البنات كانت باصة لها وبتغير منها، وإحنا ناس بسطاء وعلى قدنا وهي كانت تبان عروسة أكبر من عمرها، وكانت حلوة وجميلة وروحها خفيفة.
إيه حصل قبل الوفاة؟
قبل وفاتها قولتلها يا عايدة أنا رايح أزور أختي في العزبة قالتلي هاجي معاك، قولتلها هتيجي معايا ده أنا هروح مشي، قالتلي همشي معاك، خدتها وروحنا وأجنشتها وجبتلها لب وقالتلي نفسي في التوت جبتلها توت من على الشجر، ومكنش في أي حاجة.
قمت الصبح بدري وكانت نايمة هي ووالدتها قمت غطيتها وبوستها وروحت على شغلي بس قلبى كان حاسس ان في حاجة هتحصل وشايف الحادثة في منامي، واتصلت على والدتها مرة واثنين وقالتلي ده عايدة عندها الاسبوع ده كله امتحانات، وهي كانت الحادثة حصلت ٨.٣٠ الصبح بس هنقول إيه نصيبنا كده وأمها أهي من ساعتها وهي تعبانة وراقدة كده، وهنعمل إيه عوضنا على الله، بنتي دي كانت أطيب قلب وأحن قلب.
عايدة كبرت مرة واحدة يومها كان بيومين كنت بقول البنت دي عمرها قصير، ده قبلها بيوم قعدنا مع بعض وقولتلها تاكلي إيه يا عايدة قالتلي عايزة بطاطس شيبسي قومت عملت لها البطاطس وكلنا سوا وكانت مبسوطة وقمت الصبح بدري بوستها ومشيت.
الشاب اللي كان بيحاول ينقذها ومات تحب تقول عنه إيه؟
راجل ابن راجل ابن راجل، حاول ينقذها لكن يا ولداه معرفش وانتهى هو كمان الله يرحمه ويسامحه وقلبي زعلان عليه زي بنتي بالظبط ويشكر على اللي عمله محدش بيعمل كده ده من الناس اللي مش عايزة الدنيا ده من الناس اللي عايزة الجنة، وده فضل ربنا عليا أن بسببه بنتي جت سليمة مش متقطعة شوفتها ودفنتها بأيدي.