«سبب احترافه في العراق».. مفاجأة بشأن انتقال أحمد عبد القادر إلى الزمالك
«سبب احترافه في العراق».. مفاجأة بشأن انتقال أحمد عبد القادر إلى الزمالك
قال الإعلامي أحمد شوبير، إن هدف أحمد عبد القادر لاعب النادي الأهلي السابق والكرمة العراقي الحالي، هو الانتقال إلى صفوف الزمالك منذ رحيله عن القلعة الحمراء.
مفاجأة في انتقال أحمد عبد القادر إلى الزمالك
وقال «شوبير» في برنامجه عبر راديو «أون سبورت إف إم»: «أحمد عبد القادر طلع العراق أصلا علشان يرجع الزمالك، الراجل خلص إعارة مرتين، وجه على الأهلي ملقاش نفسه والمدربين معتمدوش عليه، هو ناوي يكرر تجربة ناصر ماهر، اللي نجحت في الزمالك وبيراميدز».
وأضاف: «أحمد عبد القادر عايز يروح نادي جماهيري، علشان ينضم للمنتخب ويثبت نفسه، ولكن الموضوع ده مرتبط بحاجتين، أول حاجة فك إيقاف القيد، وده اللي بيسعى ليه مسؤولو الزمالك بالفعل، وتاني حاجة إنه ياخد فلوس كويسة، وده مهم وميزعلش في حاجة، لأن اللاعب من حقه يطلب».
وتابع: «بالنسبة للمفاوضات بين أحمد عبد القادر والزمالك، في تفاوض واتصال وكلام وكل حاجة بين الطرفين، إلى أن تنتهي أزمة إيقاف القيد».
وواصل: «لو محصلش اتفاق بين أحمد عبد القادر والزمالك، فخليني أقولكم إن أحمد عبد القادر مطلوب في أكتر من فريق مصري، وأندية اسثمارية كمان، زي البنك الأهلي وسيراميكا كليوباترا، ومعرفش بيراميدز، ولكن أعتقد إنه صعب».
واختتم: «طب بالنسبة لأحمد عبد القادر والأهلي؟ الأهلي مش بيتكلم مع أحمد عبد القادر خالص، ولو اتكلم، أحمد عبد القادر هيقولهم قولولي فرصتي في المشاركة إيه، ولو زي زمان يبقى خلاص لا شكرا، ولكن لو عنده فرصة يلعب هيسيب الدنيا كلها ويجري».
أرقام أحمد عبد القادر
وشارك أحمد عبد القادر في 13 مباراة مع الكرمة العراقي، وسجل خلالها 4 أهداف، وقدم 4 تمريرات حاسمة.
وخاض 123 مباراة بقميص الأهلي بمختلف المسابقات، وسجل خلالها 20 هدفا، وقدم 12 تمريرة حاسمة.